Exo 27 | NdeIBE | STEP | “Yakha i-alithare ngezigodo zesihlahla som-akhakhiya libe yizingalo ezintathu ukudepha, ubude balo bube yizingalo ezinhlanu; lobubanzi bube yizingalo ezinhlanu, libe ngamamitha amabili alamasentimitha amathathu lilingene inxa zonke.

Exodus 27

I-Alithare leminikelo yokutshiswa

1 “Yakha i-alithare ngezigodo zesihlahla som-akhakhiya libe yizingalo ezintathu ukudepha, ubude balo bube yizingalo ezinhlanu; lobubanzi bube yizingalo ezinhlanu, libe ngamamitha amabili alamasentimitha amathathu lilingene inxa zonke. 2 Egumbini ngalinye le-alithare uzakwenza uphondo, kuthi izimpondo le-alithare kube yinto yinye, ube usulihuqa ngethusi. 3 Izinto zonke ezizasetshenziswa kulo uzazenza ngethusi – izimbiza zalo zokubutha umlotha, amafotsholo alo, imiganu yokuchela, amafologwe enyama kanye lezindengezi zokubasela umlilo. 4 Lenzele iminxibo yokosa ngethusi njalo wenze isongo lethusi egumbini ngalinye emagumbini wonke womane. 5 Libeke ngaphansi kwesengamo sealithare okuyingxenye yokuya phezulu. 6 Baza imijabo ye-alithare ngezigodo zesihlahla somakhakhiya uzihuqe ngethusi. 7 Hloma imijabo le emasongweni asemaceleni womabili e-alithare ukuze ibe yizibambo nxa selithwalwa. 8 Thatha amapulanka wenze ngawo i-alithare ligubhekile ngaphakathi. Lenze njengalokhu owakutshengiswayo entabeni.

Iguma lethabanikeli

9 “Lungisa iguma lethabanikeli. Ubude becele langeningizimu bube yizingalo ezilikhulu njalo libe lamakhetheni elembu lelineni elelukwe laphothwa kuhle, 10 lezinsika ezingamatshumi amabili lezisekelo ezingamatshumi amabili konke kwenziwe ngethusi kanye lengwegwe lezibopho zesiliva ensikeni. 11 Icele lenyakatho lalo lizakuba yizingalo ezilikhulu ubude njalo libe lamakhetheni, libe lezinsika ezingamatshumi amabili lezisekelo ezingamatshumi amabili ethusi futhi kube lengwegwana lezibopho zesiliva ensikeni.

12 “Icele lentshonalanga yeguma lizakuba yizingalo ezingamatshumi amahlanu lilamakhetheni njalo libe lezinsika ezilitshumi kanye lezisekelo ezilitshumi. 13 Eceleni lempumalanga, lapho kuphuma khona ilanga, iguma lizakuba banzi okuzingalo ezingamatshumi amahlanu. 14 Amakhetheni amade okwezingalo ezilitshumi lanhlanu azakuba nganxanye kwesango, elezinsika ezintathu kanye lezisekelo ezintathu.

15 Ngakwelinye icele lakho kuzakuba lamakhetheni azingalo ezilitshumi lanhlanu ubude bawo kanye lezinsika ezintathu lezisekelo ezintathu.

16 “Esangweni leguma, faka khona ikhetheni lelembu lelineni elelukwe laphothwa kuhle ngentambo eluhlaza, eyibubende, kanye lebomvu – kube ngumsebenzi womeluki, libelide okwezingalo ezingamatshumi amabili – kube lezinsika ezine lezisekelo ezine. 17 Zonke izinsika ezihonqolozele iguma zibe lezibopho lengwegwana zesiliva, kanye lezisekelo zethusi.

18 Ubude beguma buzakuba yizingalo ezilikhulu lobubanzi obuzingalo ezingamatshumi amahlanu lamakhetheni elembu elelukwe kuhle lidephile okuyizingalo ezinhlanu, lezisekelo zethusi. 19 Zonke izinto ezizasetshenziswa emsebenzini wethabanikeli loba kuyini okwenziwayo kuhlanganisa lazo zonke izikhonkwane zalo kanye lezeguma, kumele zibe ngezethusi.

Amafutha oluthi lwesibane

20 “Batshele abako-Israyeli bakulethele amafutha om-oliva acengekileyo awesibane ukuze izibane zikhanye kokuphela. 21 Ethenteni lokuhlanganela, ngaphandle kwekhetheni phambi koBufakazi, u-Aroni lamadodana akhe bazagcina izibane phambi kukaJehova zibhebha kusukela ntambama kuze kuse. Lo kumele kube ngumthetho omi njalo phakathi kwabantu bako-Israyeli lakuzizukulwane ezizayo.